ചികിത്സാസഹായം ജില്ലാ വിദ്യാഭ്യാസ ഓഫീസർ ശ്രീ. ഇ. വേണുഗോപാലൻ അച്ചുതന് കൈമാറുന്നു.പ്രധാന അദ്ധ്യാപിക ഗീത ടീച്ചർ, സ്കൂൾ ലീഡർ നിഷ എന്നിവർ സമീപം.
ഷിറിയ: വിദ്യാർത്ഥികളുടെ കൈതാങ്ങിൽ കൂലിത്തോഴിലളിക്ക് ചികിത്സാ സഹായം. ഷിറിയ ഗവ. ഹയർ സെക്കന്ററി സ്കൂളിനു സമീപത്തെ താമസക്കാരനും ഒന്നാം ക്ലാസ് കന്നഡ ഡിവിഷനിലെ വിദ്യാർത്ഥിയായ സനിതിന്റെ പിതാവുമായ അച്ചുത എന്ന കെട്ടിട നിർമ്മാണ തൊഴിലാളിക്കാണ് വിദ്യാർത്ഥികളുടെ സഹായ ഹസ്തം തുണയായത്. ജോലിക്കിടെ കെട്ടിടത്തിന്റെ സ്ലാബ് അടർന്നു വീണു പരുക്കേറ്റ പട്ടികജാതിയിൽപ്പെട്ട അച്ചുത ഒന്നര മാസത്തിലധികമായി മംഗലാപുരത്തെ സ്വകാര്യ ആശുപത്രിയിൽ ചികിത്സയിലായിരുന്നു. ഭീമമായ ചികിത്സാ ചെലവും കുടുംബത്തിന്റെ ദാരിദ്ര്യാവസ്ഥയും മനസ്സിലാക്കിയ എട്ട്‌. എ ഡിവിഷനിലെ വിദ്യാർഥികളാണ് സഹായധനം ശേഖരിക്കാൻ മുന്നിട്ടിറങ്ങിയത്. വിദ്യാർഥികൾ തങ്ങളുടെ ആഗ്രഹം ഹെമിസ്ട്രെസ്സിനെ അറിയിക്കുകയും ഹെട്മിസ്ട്രെസ്സ് ഇത് സ്കൂൾ അസ്സംബ്ലിയിൽ അറിയിക്കുകയും ചെയ്തതോടെ സ്കൂളിലെ വിദ്യാർഥികൾ ഒന്നടങ്കം ഈ പരിപാടി ഏറ്റെടുക്കുകയായിരുന്നു. അധ്യാപകരായ അബൂബക്കർ മാസ്റ്റർ, രവീന്ദ്രൻ മാസ്റ്റർ, രഞ്ജിനി ടീച്ചർ എന്നിവർ നേതൃത്വം നല്കി.
